Amasa‘n Kuki chate jouse nabon chau vin Kuki Students‘ Organisation, Delhi min in KUMTHAH Chibai kahin bol uvin ahi.

Phaat leh nikho, kum le lha kihei dung jui in, Kuki Students‘ Organisation jong ihung machal jing uvin, tuni chan geija eihin mapui jing uva Pathen thangvah in umhen. Society khantou naleh machal na teho hi Lamkai ho a kon ahipo‘n, mipi teho; ateh akhang, alen aneo, pan iha lah najal u leh Pathen in eipeh u nam ngailut na inei nate hou jal ahin, hijeh chun nachung uva kipa thu kahin phong in ahi. Pathen in alhasam ding leh akhesuh ding a eidei lou jeh uva tuni chan a society min-phah/nam ngailut na inei jing thei u ahi. Hijeh chun society machal be na ding leh khantou be na cheh ding in kilung toh tah in pan lakhom jing ute tin iki tem uvin ahi. Koima aki nganse tum um lou vin, kei jong ka society a ding in ka poimo lheh jeng e tia igel cheh uva pan ilah diu vin iki tem kit uvin ahi. Henge, mi abang in asei na ah…na society na ngailut leh nangma kin-gailu masa‘n lang, kisemtoh ta di‘n atiu vin ahi. Adih nai, ahinlah, nangma naki sem-toh kah a chu na society chu koi in navet tup peh a koi in na sem tup peh ding ham? Hiche hi athah beh a igel diu vin kadei in ahi.

Adeh in khangthah teho hi Nampi/Society a ding in mi manlu tah/mi poimo tah ihiu vin, hijeh chun society in ingaichat pet uva hi eiho‘n jong ipi ham ka society a ding a kabol thei ti‘n pan la pan di‘n iki tem uvin ahi. Thanom lheh jong leu hen pan ilah thei lou phat u hung um thei ahi. Lamkai gahi khel khel a pan lah ding ahideh po‘n, member hi na a konna jong nasa tah a pan lah thei ahi. Athupi pen chu ahileh, Lam-kai ho phatah a tosot jing a ahetlou te hou hil jing angai in ahi. Ajeh chu lamkai ho‘n society machal na leh khantou na ding a hin amaho deilam hilouva, mipi lung deilam a bou tohguon asem uva ache pe‘u ahi. Hijeh chun society a ding a lunglha louva athah beh a pan ilah di‘u vin iki tem uvin ahi. Koi hileh a Nam/Society ngailu thei lou chu athisa vah lele tobang. Hijeh chun sopite ho Pathen in ama lim leh mel a isem uva phat thei iboh na te ho‘u hi inampi/society a ding a thil phachom tah asodoh thei na di‘a iman chah diuvin iki tem uvin ahi.
Achai na in, ibol, itoh, itham nacheh uva gunchu tah leh kitah tah a ipan jing diu vin iki tem uvin ahi. Ajeh chu mihemkhat hinkho a hin Kitah na hi athupi mama jeng in ahi. Kitah na neilou mihem chu pahcha hoitah anam umlou tobang ahi. Pathen in eimapui u hen lang, ei umpi jing ta‘u hen. Hingsot hen, Damsot hen, KSO atonsot tonsot in.
Kakipah e.

L. etkhomang Haokip
President, KSO (D).